Festa della donna
Ala dòna de sti agn
- Details
- Category: Festa della donna
- Published on Thursday, 08 March 2012 07:17
- Written by Giudicarie.com
- Hits: 8325
Té levéve su prèst la domà
e magari té néve ànca a Mèsa prima;
dopo, sùbit a cà a preparàr la colazió',
a 'nviàr via i granc e i piciói
e a distrigàr i mistér de prèssa
perché dopo ghèra i camp, i prè, la stala.
A mezdì, con precisió, él disnàr:
parói e padèle, tovàie e piàc;
e tuc che ósa, e tuc che gà fàm.
El secèr l'è sempre pié'
e negùgn che té daga na mà'.
No te ghe témp de polsàr:
bisogna lavàr, sugàr giù e stiràr;
calzèc da ramendàr, braghe da cusìr,
camìse da preparàr per la festa...
e 'ntant bòce da tiràr su,
da córerghe dré, da far studiàr...
e òm 'ntà i camp che spèta la merenda
e vache 'ntà la stala da governàr.
L'ora de cena l'è sùbit lì
e la cà l'è piena de gós:
òm che ósa, bagài che cìga,
putèi e putèle che se cór dré...
Dàrghe da magnàr a tuc,
po' spreparàr e lavàr giù;
na spazada 'n cusìna
'n po' de filò 'nta la stala
e, un a la volta, tuc a dormìr.
Ma per ti - dona de sti agn! -
nó l'èra gnamó finìda la giornada:
ùce da màia, gromisèi de lana,
cànef, fasói e zaldo da far fò,
òrz da brustolàr e da pilàr...
*
Quan che té sè ti sóla
e té té cerche ti...
té té 'ndroménze, straca morta,
e té gate 'l tó "èsser ti"
sól 'n quel mondo
che té póde sól sognàr!
Ala dòna d'ancó
Té è volèst l'indipendenza;
la tó vóia de laoràr fò de cà
per guadagnàr vergót e far la sióra
la t'à portà fò da la tó famèia
e cossì...
Tè tóca levàr su prèst la domà
per spaciugàr su 'nprèssa
i quàter mestér de cà,
dàrghe da vestìr e da magnàr ai tó
e... via de córsa:
i pòpi o al "nido", o a l'asilo, o a scóla,
l'òm per só cónt dré ai só mistér
e ti 'n ghìngherli sa 'l posto de laóro:
'n fàbrica, 'n uficio, 'n botéga.
A mezdì... salti bòia
per far quadràr i orari;
e po'... amó a sporcàrse le mà'
a combinàr vergót che nó' sempre 'l piàs.
A qualche ora, finalmente, dént da la tó porta:
gnànca 'l témp de sentarte giù
che già 'l putèl o la putèla
i gà bisógn de ti...
e la cusìna la tè ciàma per la cena,
la "lavatrice" la reclama la só giornada,
i pavimènc i vorìa 'n po' de céra
e amó... él stiràr, i fiori, él gat...
Dopo cena quàtre bèghe 'n famèia
per én tòch de cìne ala tivù
e, straca morta ànca ti
- come tutte le brave dòne de stó mondo -
té cerche 'n tòch de lèt,
té pòste 'l cò sa 'n cussìn
e té vè via cói Àngioi
senza podérte dar gnànca 'n pensér..
Sét bóna, almén, có i tó sòldi
de gatàr du dì sól per ti,
per darte vergót che sól ti té sé,
per èsser quèla che ti té vorìe èsser
e, nò, sempre quèla, e sól quèla
che i altri i vól che ti té sìe?...
Càmbia i agn...
ma la dòna l'è sempre straca de laoràr
e ànca quan che la pensa de èsser "emancipada"
l'è sempre lì che la le fa tute
per piàserghe ai altri, per darse da far per quèi altri:
e la sé crùzia se nó i la varda
e la gà quasi pòra de sentìrse sóla con èla!